أيوه فهمت
لكن متأخر
ان الحلم الحلو أتبخر
وان وجودي كان ف حياتك
بس صديق يا دوب مش اكتر
ايوة صديق
يعني نهايته معاكي اعجاب
وان صداقتنا طالت حبه
ممكن يعني يكون تعليق
رغم حكاوي كتير جمعتنا
واني اخترتك لجل احكيلك
لما ف يوم حسيت بالضيق
بس فهمت
عندي أكيد مشكله ف الفهم
ان انا فعلا فهمي بطيئ
معذور اني جديد ع الفيس
وان الفيس دا بحره غريق. واني يادوبك بس صديق
واني اصحابك ألفين واكتر
ايوة فهمت.لكن متأخر؟؟؟
دنا حبيتك!!!!
كنت بقضي ساعات ف الشارع
لجل تجيني لو رنايه
وافضل نازل وافضل طالع
واتعب كل الناس ويايا
ويقولوا مالك
ويكون ردي
ان الحب الطاهر قصدي
ردوا قالولي فات السن
جاي دلوقتي يا عم تحن
ناس قبليك حبوا اكتشفوا
ان طريق الحب مواجع
قبلك واحد حب خانوه
ولما خانوه ساعتها أتجن
كنت بدافع ياما عن حبك
اطلع تاني أقولهم ايه
اني طلعت نزلت تعبت
واني اخيرا يعني فهمت
اني يا دوبك بس صديق
وان فطاري كان يتأخر
لجل تجيني منك حاجة
تبل الريق
كل دا كله كان أوهام
كان أحلام يا دوب مش أكتر
ايوة فهمت لكن متأخر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.