ليه ياحاجة
احمد صبري
-
ليه يا حاجة خلعتي حجابك
بقالك مية سنة لبساه
خدعتي كل اْحبابك
والباقي انتي عرفاه
وعينا عليكي بتصلي
واْد الدنيا تستاهلي
تبيعي ليه وتتساهلي
بالموت وبالحياه
-
ليه يا حاجة ساقيتي ولادك
من سم الغدر والفتنة
قفلتي في وشنا بابك
ف عز الصعب والمحنة
بصمتي وحقنا بيتباع
ولومتي اللي فينا جاع
رميتي في الزبالة بتاع
وقولتي اْكلنا إحنا
-
ليه يا حاجة غيرتي حالك
ويعدي عليكي الزمن
واللي يموت من عيالك
مش بيلاقي الكفن
العاقل بقى مجنون
والقاسي عامل حنون
واللي بيحبك مسجون
وسط المرض والعفن
-
ليه يا حاجة ضيعتي مالك
والدين علينا بالهبل
وتمدي يمينك وشمالك
وصوت الحق ينسحل
بطلتي يا حاجة تتوضي
قبلتي نطاطي وتوطي
بتبيعي دمي وارضي
ويتقتل فينا الامل
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.