زجل:
وْرِيثْ غافلْ ولاَّ فاشلْ
ــــــــــــــــــــــــــــــــــ
رْسامْ وْتادْ أُخِيمةْ
فَ زَّحْمةْ أُظَّلمةْ
منْسِيَّةْ أُممْحِيةْ
صْحابْها حَضُروا أُراحُوا
خلّْفُوا وْلادْ أُحْفادْ
تاريخْ أُمْجادْ..
سلّْمُوا لْمشْعلْ
حْملْ تْقيلْ
أُلَوْريثْ جِيلْ عْل جِيلْ
ما يحْملْ أُما يْكمَّلْ..
غافلْ ولاَّ فاشلْ..
لْماشِي تالفْ أُلْواقفْ خايفْ
أُبِينْ أُبِينْ حْرِيرةْ مْحَرْحرةْ
طْريقْ ما مْسلّْكةْ زَفْتةْ مْعَلّْكةْ..
وْرِيثْ قْطعْ صِلاتُو بْ دِيَّارو
أُخْطَأْ مَسَارو
أُما بَغِ يحْسمْ قَرَارو
مْفوَّضْ أُمُورو لْغِيرو..
مْقلَّدْ أُتابعْ
راضِي أُقانعْ بْ قَسْمةْ لْمفعُولْ فِيه
أُما يْهمُّو شِي فِعلْ ولاَّ فاعلْ..
وْرِيثْ ما يحْسَنْ فِراسةْ ولاَ دِراسةْ
أُما عنْدو دِرايَةْ بْ شِي قِفايَةْ
ما يشْقَى أُما يتْعبْ
ما يبْحثْ أُما يْنقَّبْ..
حْبلْ عَزْمو عْلِيه ما تْعَوَّلْ
ما يْحزَّمْ أُما يْشكَّلْ
راشِي، رْهِيفْ أُخْفِيفْ
لَنَّارْ ما يْفِيدْ زْنِيدْ، دَغْيا يشْعلْ
دغْيا يَطْفى، ما يْحَمِّي أُما يَكْفِي..
عايَشْ فَ زْمانْ نْوَارو كَثْرتْ أُشَعْشعتْ
بْ فَضْلْ لْعِلمْ أُتِّكْنولوجيا تسْرِي نِعَمْها كَراماتْ أُمُعْجزاتْ..
مْدوَّخْ غِير إِدُورْ
مَلْهِي فَ قْشُورْ
بِينْ خْيوطْ شَّبْكةْ أُلْخاوِي، حاضِي لْعِيبْ أُلفْعايلْ
أُيَتْفنَّنْ فْ لَعْفنْ رْذايلْ..
ــــــــــــــــــــــــــــــــــ
محي الدين أمهاوش/طنجة
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.